Комисија формирана од специјалисти ќе утврдува дали има лекарски пропусти во третманот на 57 годишниот пациент со тешка срцева состојба, кој почина на Клиниката за кардиохирургија, каде операционата сали за такви интервенции била надвор од функција.
Министерот за здравство вели дека пациентот бил примен, но лекарите одлучиле тој да се лекува конзервативно, а не да биде подложен на оперативен зафат.
„Формиравме стручна комисија да ги испита сите детали за овој случај. Докторите одлучиле тој конзервативно да се третира. За жал, не знаеме што се случило и зошто настапила смрт кај пациентот и зошто семејството не дозволило да се направи обдукција, бидејќи е констатирано дека тој има и други здравствени проблеми, не само аневризма на аортата.“ – Арбен Таравари министер за здравство.
Сепак, дали имало јасни протоколи и координираност за упатување на вакви тешки случаи во случај кога операционата сала не работела на државната клиника, но и постапувањето на приватните клиники каде Фондот исто така покрива вакви операции, ќе утврдува стручната комисија.
Првиот човек на Фондот за здравство вели дека договорите со приватните клиники се активни и квотите за тие операции не се потрошени.
„Двете приватни кардиохирургии Жан Митрев и Систина имаат новосклучен договор со фондот за 2025 и ваквите операции не може да бидат „потрошени“ во април месец. Ако воопшто така одговориле од било кого, тоа не е точно. Во усната комуникација со „Жан Митрев“ негираат дека имале таков пациент. Тие велат добиле це-де со снимките и усно тврдат дека рекле да биде донесен пациентот. Сите тврдат дека пациент во животозагрозувачка ситуација нема да биде вратен.“ – Сашо Клековски директор на ФЗОМ.
Семејството на сега починатиот пациент обвини за пропусти во третманот. Комисијата ќе треба да го провери и нефункционирањето на операционата сала, протоколите за упатување на тешки пациенти во вакви случаи како и координираноста помеѓу здравствените институции.
Извор: 24vesti.mk
