ВИЛНУС (АА) – Генералниот секретар на НАТО, Јенс Столтенберг, синоќа изјави дека меѓу Туркије и Шведска ќе биде воспоставен билатерален безбедносен механизам и дека ќе биде именуван првиот специјален координатор на НАТО за борба против тероризмот, јавува Анадолу.
Столтенберг пред Самитот на НАТО во Вилнус, главниот град на Литванија, одговараше на прашањата на новинарите по состанокот со турскиот претседател Реџеп Таип Ердоган и шведскиот премиер Улф Кристерсон во врска со барањето на Шведска за членство во НАТО.
„Со задоволство можам да објавам дека Ердоган се согласи да го упати Протоколот за пристапување на Шведска во НАТО до турскиот Парламент колку што е можно поскоро и дека е во блиска соработка со Парламентот на негова ратификација“, изјави Столтенберг.
Тој истакна дека Шведска и Туркије работат на решавање на легитимната безбедносна загриженост на Анкара по Самитот одржан во Мадрид.
Столтенберг истакна дека ќе продолжи борбата на Шведска против тероризмот.
„Туркије и Шведска се согласија да воспостават безбедносен механизам. НАТО сериозно ќе ги зајакне активностите во таа област. Првпат во својата историја НАТО ќе именува специјален координатор за борба против тероризмот“, рече Столтенберг.
Во текот на трилатералниот состанок меѓу Туркије, Шведска и НАТО во Вилнус, објавено е дека Шведска повторила дека нема да ги поддржува терористичката организација ЈПГ/ПЈД и терористичката организација ФЕТО.
Како што истакна Столтенберг, на состанокот меѓу Туркије, Шведска и НАТО е наведено дека Шведска ќе го поддржи членството на Туркије во ЕУ, вклучително и ажурирањето на Царинската унија и либерализацијата на визниот режим.
На дводневниот Самит на НАТО, кој се одржува на 11 и 12 јули, ќе се разговара за војната меѓу Русија и Украина, предизвиците за НАТО и чекорите за јакнење на одбраната и одвраќање. На дневен ред ќе биде и кандидатурата на Шведска за вклучување во НАТО.
Извор: www.aa.com.tr
