Директорот на Државниот пазарен инспекторат (ДПИ), Влатко Стојкоски, информира дека по укинувањето на мерките за ограничување на маржите и замрзнување на цените, кое заврши на 30 април, се забележува умерен раст на цените во малопродажба, додека во големопродажба тие се враќаат на нивото од пред мерките.
– Има умерено зголемување на цените на пазарите во малопродажба. Кај производите со најголем обрт зголемувањето се движи од 3 до 5%, додека кај производите за лична хигиена, бебешка храна и пелени цените се зголемени за 10 до 20%. Од друга страна, кај зеленчукот и овошјето има значителни намалувања, дури од 20 до 100% – изјави Стојкоски на денешната прес-конференција во Владата.
Анализата на ДПИ, направена пред десетина дена, е веќе доставена до Министерството за економија и труд. Таа е изработена врз основа на контроли спроведени кај над 100 субјекти и над 1.000 продажни места низ државата.
Како што додаде Стојкоски, станува збор за обемна анализа која сега е во надлежност на Министерството за економија, кое треба да ја разгледа и да донесе соодветни заклучоци.
ИЗВОР: ТВ 21
