Со проекцијата на францускиот филмски хит „Грофот од Монте Кристо“ во киното Синеплекс, на 7 март се отвора Месецот на Франкофонијата во Скопје, чии содржини ќе се одвиваат до 8 април. Во креирањето на филмската програма учествуваа амбасадите на Грција, Бугарија, Швајцарија, Романија, Канада, Белгија и Франција, па ќе биде прикажан по еден филм од секоја од овие земји. Македонската кинематографија ќе ја претставува „Убиј ги прво децата“ на Димитар Оровчанец, што ќе се прикаже на 27 март во Кинотеката.
„Зошто секоја година во март ги славиме Франкофонијата и нејзините вредности? Зошто го правиме тоа заеднички? Франкофонијата е заеднички јазичен простор, со повеќе од 300 милиони говорници во светот, но и простор на вредности. Ова не е само лингвистичка заедница, туку и политичка организација, во која членуваат 93 држави, а Северна Македонија е рамноправна членка од 2006. Овој месец е повод да истакнеме и една нова едукативна соработка, откако направивме план за возобновуање на интересот за изучување на францускиот јазик во основните школи. Сакаме да ги охрабриме учениците да го изберат францускиот јазик како втор странски јазик“, кажа амбасадорот на Франција во Македонија, Кристоф Ле Риголер.
Покрај филмови, во рамките на Месецот на Франкофонијата ќе се одржат и изложба, натпревар по изразно читање, младински франкофонски парламент, ден на франкофонски култури… Посебен настан ќе има во Битола на 17 април, кога ќе настапи францускиот пијанист Лоран Кулондр.
Г. КОНЕВ
ИЗВОР: sdk.mk
