Нови 30 дена притвор за Крешник Бектеши. Судот одлучи да ја продолжи мерката за поранешниот министерот за економија кој е опфатен со истрагата за трагедијата во Кочани, поради исти околности како и претходно – постоење на основано сомнение за злоупотреба на службена положба и овластување.
Одлуката следи по укажувањата на државниот обвинител Љупчо Коцевски, кој истакна дека министри за економија, меѓу кои и Бектеши, издавале лиценци за работа на кочанската дискотека „Пулс“ врз основа на непотполна и некомплетна документација.
Поранешниот градоначалник на Кочани, Љупчо Папазов, кој поднесе оставка по трагичниот пожар во дискотеката „Пулс“, оди во куќен притвор. По барање на обвинителството, истата мерка е изречена и за уште тројца осомничени, меѓу кои поранешниот директор на Државниот пазарен инспекторат Горан Трајковски, еден инспектор и член на обезбедувањето.
А доддека трае истрагата за трагедијата во Кочани, Од СДСМ обвинуваат дека 30 дена по пожарот, истрагата за трагедијата се води селективно и во сосема погрешен правец.
„По девет месеци на централна власт и речиси четири години локална власт на ВМРО-ДПМНЕ, никој од нивните не е одговорен, а одговорни се сите службеници и функционери до 2022 година. Кај сите осомничени се водат постапки за периодот од 2012 до 2022 година. Но, што е со одговорноста на оние што на денот на пожарот 16 март 2025 година биле на високи полициски функции, но и во други институции? “ – Богданка Кузевска портпарол на СДСМ.
Во меѓувреме, пензионираниот полицаец, по кој МВР трагаше, бидејќи е еден од осомничените за трагедијата во Кочани, утринава се пријавил во полициска станица. Кривичниот суд пак додели мерки на претпазливост за сите полицајци осомничени во истрагата за трагедијата во Кочани. Кривичен ги прифати предлозите на обвинителството за организиран криминал и корупција и изрече мерки за претпазливост за шестмина од полицајците осомничени за пожарот во дискотеката пулс во кочани.
Во исто време, прифатен е и предлогот на еден од осомничените, да му се определи мерка забрана за комуникација со останатите осомничени, бидејќи останатите три мерки за ова лице се активни во предмет од 2019 година. Воедно, на предлог на обвинителот, а со оглед дека истекува притворот за осомничените опфатени со претходната истрага, истиот е укинат и им се изречени истите мерки на претпазливост.
Досега, со истрагата за пожарот во дискотеката Пулс во Кочани а во кој животите ги изгубија 61 лице, опфатени се над 60 физички и три правни лица меѓу кои сопственикот на дискотеката, сегашни и поранешни градоначалници на Кочани, поранешни министри за економија, поранешни директори на Државниот пазарен инспекторат и полициски службеници.
Извор: 24vesti.mk
