Со завршните зборови на претставниците на Основното јавно обвинителство и одбраната, во Основниот суд во Струга заврши судењето против градоначалникот на општина Струга, Рамиз Мерко, кој е обвинет за незаконско именување на директори во основните училишта во селата Лабуништа, Радолишта и Подгорци.
Судијата Јордан Јованов што води повеќе предмети против градоначалникот Мерко, рече дека пресудата по овие два предмети ќе биде изречена утре.
Јавниот обвинител Џемал Лога, во завршниот збор нагласи дека обвинетиот како градоначалник очигледно постапувал спротивно на позитивните законски прописи во повеќе случаи, именувајќи лица кои не ги исполнувале условите за времено именување за директор.
-Станува збор за основното училиште во Подгорци, ги слушнавме завршните зборови и го очекуваме решението – ќе видиме, изјави Џемал Лога, јавен обвинител.
Мерко е обвинет дека именувал вршители на должност директори без одлука од училишните одбори, без распишан конкурс и постапувал со негрижа во користењето на своите дискрециони овластувања како градоначалник, со што, меѓу другото, го нарушил процесот на функционирање на образовните институции. Сите предмети поврзани со училиштата што се водат против градоначалникот на општина Струга, Рамиз Мерко, се во завршна фаза.
ИЗВОР: ТВ 21
