Реномираниот сликар Сергеј Андреевски ќе биде автор на дизајните на плакатите за концертите на Националниот џез-оркестар (НЏО).
„Неговото творештво се движи во границите на постекспресионизмот, а импровизацијата и слободата на изразувањето се едни од главните одлики на џез музиката, па вксрстувањето на нашите сродни сензибилитети веруваме дека неминовно ќе вроди со плод“, соопштија од Оркестарот.
Андреевски, уметник со меѓународна кариера, вели дека слика како џез музичар, дека е сликар кој често патува и сонува низ светот, вкрстувајќи ги четките и насочувајќи ги своите потези кон сонцето.
„Светот е моето ателје. Мојата творечка припадност е стилот на постекспресионизмот, а тоа е бесконечна слобода на изразувањето. Звукот е мојот партнер при создавањето. Особено џезот; оти јас кога сликам, импровизирам – не случајно велам дека сликам како џезмузичар“, вели Андреевски.
Андреевски има реализирано над 60 самостојни претставувања низ светот меѓу кои изложбата „Неизложени дела на хартии,“ Општинска галерија Ремецо во Каламариа, Солун, „АЗБУКА“ во Народен музеј „Конак Кнегиње Милице“, Белград, а изложувал и во Јапонија, САД. Бил дел и од над 200 групни претставувања низ светот.
Основач на меѓународниот центар за уметност и одржлив развој „Арт поинт – Гумно“, со седиште во сeло Слоештица, каде што е и куратор на Меѓународната уметничка резиденција и колонија, што успешно се реализира од 2003. Добитник е на повеќе награди и признанија. Неговите дела се дел од поставките на државни институции, музеи и приватни колекционери низ светот.
ИЗВОР: sdk.mk
