Под слоганот „Не забораваме“, Синдикатот на вработените во јавниот сектор во Грција, за денеска закажа 24-часовен штрајк, на годишнината од железничката несреќа кај месноста Темпи во која животот го загубија 57 лица, но и за да ги истакнат нивните барања за зголемување на платите и дополнителни вработувања, јави дописничката на МИА од Атина.
Штрајкот го поддржаа и низа федерации, помали синдикати, здруженија и сл., но и новинарите кои ќе имаат четиричасовен прекин на работата од 12 до 16 часот.
Бродовите денеска остануваат закотвени на пристаништата, возовите на железничките станици, а иако беше најавен штрајк на контролорите на летање, а со тоа и откажани летови, сепак штрајкот доцна синоќа беше прогласен за незаконски и авиосообраќајот ќе се одвива нормално.
Атина од вчера е без такси превоз поради 48-часовниот штрајк на таксистите, а денеска има проблеми и во јавниот превоз.
Метрото и трамвајот не функционираат, а автобусите и тролејбусите имаат неколкучасовен прекини во работното време.
Во рамките на 24-часовниот штрајк планирани се и низа протести како во Атина, така и во другите грчки градови.
Извор: 24vesti.mk
