Шолц го увери Зеленски дека ќе има германска поддршка колку што е потребно

Ќе ве поддржуваме сè додека е потребно. Оваа солидарност е трајна и е силна, рече Шолц по средбата со Зеленски

Германскиот канцелар Олаф Шолц го уверил украинскиот претседател Володимир Зеленски за поддршката на Германија во борбата против руската инвазија врз Украина.

„Ќе ве поддржуваме сè додека е потребно. Оваа солидарност е трајна и е силна“,

рече Шолц на средбата со Зеленски во неговиот кабинет во Берлин.

Шолц рече дека Германија ќе продолжи да и помага на Украина на хуманитарен, политички и финансиски план, но и со оружје.

Тој укажа и на новиот пакет воена помош во вредност од 2,7 милијарди евра, што германската влада го потврди во саботата.

Шолц уште еднаш ја осуди руската инвазија на Украина и го изрази своето восхитување за херојскиот отпор што Украинците му го нудат на рускиот агресор.

Зеленски, кој претходно се сретна со германскиот претседател Франк-Валтер Штајнмаер, се заблагодари за германската поддршка.

„Новиот пакет воена помош претставува многу важна и силна поддршка. Украинскиот народ секогаш ќе биде благодарен за поддршката на Германија“,

рече Зеленски на заедничката прес-конференција во кабинетот на канцеларот.

Тој објасни дека Украина во моментов работи на враќање на окупираните територии и објасни дека украинската армија не напаѓа цели на руска територија.

„Немаме ниту време, ниту сила, ниту оружје за такво нешто. Нашата цел е да ги вратиме неправедно окупираните територии“,

рече Зеленски.

Украинскиот претседател апелираше до Германија да придонесе за создавање „коалиција за испорака на борбени авиони во Украина“. Шолц реагираше воздржано, посочувајќи дека Германија ќе се фокусира на „системите за оружје испорачани досега“.

Во исто време, Зеленски нагласи дека Украина е подготвена за мировни преговори, кои мора да се засноваат на украинските позиции и мировниот план, што значи целосно повлекување на руските сили.

„Станува збор за војна што се одвива на наша територија“,

рече Зеленски.

Шолц најави дека попладне заедно со Зеленски ќе отпатува за Ахен, каде на украинскиот претседател ќе му биде врачена наградата „Карло Велики“, која се доделува на луѓе кои „дадоа посебен придонес во процесот на европското единство“.

Програмата на посетата на украинскиот претседател се чуваше во тајност до последен момент. Зеленски пристигна во Берлин од Италија со германски владин авион и придружуван од германски воени авиони.