Ова е застрашувачкиот момент што го потресе Луивил. Безбедносните камери го снимија летот 2976 на УПС, само неколку секунди по полетувањето од меѓународниот аеродром. На левото крило веќе има пламен. Авионот не успева да добие висина и удира во земјата, предизвикувајќи огнена стихија.
Веднаш потоа, густ црн чад го прекри небото. Авионот „Мекдонел Даглас МД-11“, со тројца членови на екипажот, требало да лета за Хонолулу. Несреќата се случи во 17:15 часот, а авионот удри директно во индустриска зона на работ на аеродромот.
„Во овој момент, веруваме дека имаме најмалку три смртни случаи. Но, верувам дека тој број ќе се зголеми. Имаме најмалку 11 повредени, некои од нив многу сериозно, кои се третираат во локалните болници“, вели Енди Бешир, Гувернер на Кентаки.
Судбината на тројцата членови на екипажот сè уште не е официјално потврдена, иако гувернерот изрази загриженост за нив по гледањето на снимките. Авионот директно погодил најмалку два деловни објекти.
„Првиот е „Patrol Cycling“. Изгледа се директно погодени. Вториот е „A auto parts“. Тие ги евидентираа сите свои вработени, освен двајца. Но, не знаат колку други лица, клиенти или други, биле на локацијата во тоа време“, изјави Бешир.
Властите издадоа наредба за засолнување за сите области северно од аеродромот, поради опасноста од чадот. Пристапот до местото на несреќата е блокиран.
„Ве молам, држете се настрана од областа. Дозволете им на одговорните да си ја завршат работата. Ова ќе биде активна сцена во наредните неколку дена.“, рече Пол Хамфри, шеф на полицијата во Луивил.
Националниот одбор за безбедност во сообраќајот ја презема истрагата за причините за несреќата. Авионот бил произведен во 1991 година. Аеродромот во Луивил е инаку најголемиот светски центар за ракување со пакети на УПС.
Извор: tv21
