Советот за безбедност на Обединетите нации ќе се состане денес на разговори за упадите со беспилотни летала во полскиот воздушен простор, што полскиот претседател Карол Навроцки го опиша како обид на Русија да го тестира одговорот на Варшава и НАТО.
Состанокот на Советот за безбедност на ОН беше свикан на барање на Словенија, Данска, Грција, Франција и Велика Британија.
Полски борбени авиони Ф-16, холандски Ф-35 , италијански авиони за надзор АВАКС и авиони на НАТО за полнење гориво учествуваа во операцијата за соборување на беспилотни летала во полскиот воздушен простор во текот на ноќта меѓу 9 и 10 септември, кои дојдоа од правец на Украина и Белорусија, објавија претходно официјални лица.
Полскиот министер за одбрана Владислав Косињак-Камиш изјави во парламентот на земјата дека досега се пронајдени остатоци од 16 дронови и дека полската логистичка поддршка на Украина во војната против Русија можеби била мотивација за упадите.
Во среда, НАТО го активираше Член 4 од Северноатлантскиот договор, според кој членовите на Алијансата можат да побараат консултации со своите сојузници доколку се заклучи дека нивниот „територијален интегритет, политичка независност или безбедност“ е загрозен.
Извор: tv21
