Министерството за правда го изготви предлогот за разрешување на државниот јавен обвинител Љупчо Коцевски до следната редовна владина седница, односно до наредниот вторник, оваа точка би се нашла на дневен ред на првата наредна седница.
Според првиот вицепремиер Изет Меџити, меѓу коалициските партнери наводно не се разговара кој да биде нов државен обвинител, бидејќи како што вели Меџити, ‘не разговараат за одредено име, туку за човек кој треба да биде посветен професионалец“.
„Во принцип, не зборуваме за име, зборуваме дека треба да биде професионалец којшто ќе придонесе да се врати довербата на граѓаните во судството и обвинителството“,изјави Меџити.
Организацискиот секретар на СДСМ, Мартин Костовски, во врска со постапката за разрешување на државниот јавен обвинител, истакна дека тоа не е реформа на судскиот систем, туку упад во правосудниот систем за инсталирање на партиски кадар и послушник на власта.
„Ова не е реформа, туку кршење на демократијата, удирање во чело на уставниот поредок, на поделбата на судска, извршна и законодавна власт“, рече Костовски.
Тој нагласи дека и СДСМ не е задоволна од работата на државниот јавен обвинител но начинот на избор на јавен обивнител мора да биде законска.
„Не сме задоволни. Нема покренато постапка за Груби, кривична пријава или прогон за именувањето на Бојан Христовски во АНБ, за неговиот сертификат, за пуштањето на Блерим Рамадани на истиот граничен премин, за сите екскузрии што ги правеше Гаши, со обезбедувањето на скопскиот аеродром, одењето со сватови. Досега нема ништо од Јавното обвинителство“, рече Костовски.
Ако не се почитуваат процедурите се врши упад во правосудниот систем за инсталирање на партиски кадар, нешто што е веќе видено, додаде тој.
„Власта веќе има поставено сопруга на градоначалник на ДПМНЕ во Судскиот совет, близок пријател на Меџити во Советот на јавни обвинители. Значи се враќаме назад, во лоши минати времиња, режим, контролирани постапки, уценети судии и јавни обвинители“, нагласи организацискиот секретар на СДСМ Мартин Костовски.
Инаку, според Законот за јавно обвинителство, на предлог на Владата, републичкиот јавен обвинител го именува Собранието за време од шест години со право на повторно именување.
ИЗВОР: racin.mk
