реклама
Власта и опозицијата со меѓусебни обвинувања кој е виновен за тоа што Македонија не ги продолжува преговорите со Европската унија. Од владејачката СДСМ сметаат дека поради блокадите на уставните измени од страна на ВМРО-ДПМНЕ Македонија не ги отвори поглавјата од преговорите со ЕУ.
„Денеска сите ние можевме да славиме, Македонија да се радува на отворање на поглавјата и продолжување на европскиот пат. Виновникот зошто тоа не се случи има име и презиме – Христијан Мицкоски и ДПМНЕ. Блокадите на антиевропската коалиција на ДПМНЕ и Левица се единствената причина и покрај тоа што имаме успешно завршен скрининг процес, и покрај тоа што имаме силна и недвосмислена поддршка и отворени врати на ЕУ“, вели Богданка Кузеска.
реклама
Од ВМРО-ДПМНЕ пак ја отфрлаат вината и тврдат дека уставните измени воопшто не се причината зошто нема преговори со ЕУ, туку дека дел од државите членки на ЕУ не сакаат членство на Македонија во ЕУ. Олаф Шолц може да им помогне и да го викне бугарскиот премиер на кафе, исто како што тоа го сторија со Орбан за Украина, рече потпретседателот на партијата Александар Николоски.
„Еве од СДСМ велат дека Олаф Шолц германскиот канцелар им е голем пријател, нели се од исто политичко семејство, социјалистите од социјалдемократите па се прашувам зошто тие големи пријатели кои ги имаат со кои нели се фалат и се китат со туѓи перја, не го замолија бугарскиот премиер да излезе на едно кафе на 15 минути да се изгласа одлуката за Македонија да почне преговори со Европската Унија и на тој начин да се реши проблемот“, порача Александар Николоски.
реклама
Македонија на Европскиот самит во Брисел не доби зелено светло за отворање на поглавјата со Европската унија и со тоа да ги продолжи преговорите. Од друга страна пак, Украина и Молдавија добија почеток на преговори откако за време на гласањето германскиот канцелар Олаф Шолц го изнесе унгарскиот премиер Виктор Орбан на кафе бидејќи тој беше против оваа одлука.
реклама
