Американската филмска легенда Роберт де Ниро ќе добие почесна Златна палма за животно дело на свеченото отворање на Канскиот филмски фестивал, на 78. издание од 13 до 24 мај. Пред 14 години, Де Ниро, кој е актер, режисер и продуцент, беше претседател на жирито во Кан. Последен пат беше во Кан во 2023, за премиерата на филмот на режисерот Мартин Скорсезе, „Убијците на цветната месечина“.
„Многу сум приврзан за Канскиот фестивал. Особено сега, кога има толку многу работи во светот што нѐ разделуваат, Кан нѐ зближува – сценаристи, филмски уметници, обожаватели и пријатели. Тоа е како да се враќам дома“, изјави 81-годишниот глумец за почесната Златна палма.
Уште со првото појавување на филмското платно, во првите филмови на штотуку дипломираниот Брајан де Палма, Роберт Де Ниро стана препознатлив по улогите на негативци. Денес веќе легендарното пријателство со Мартин Скорсезе почна во 1973 со „Злобни улици“.
Во текот на својата кариера, Де Ниро глумеше ликови од италијанско-американската мафија, од ситни насилници до големи мафијаши, при што, ја играше и една од најзначајните улоги во неговата кариера и во светот на кинематографијата воопшто, младиот Вито Корлеоне во „Кум 2“ на Френсис Форд Копола, и успеа во предизвикот да ги долови младите години на ликот на Марлон Брандо без да го имитира. Таа улога му донесе Оскар за најдобра споредна машка улога.
Во 1976 глумеше во две ремек-дела на филмската уметност во официјалната селекција на Канскиот фестивал: „1900 година“ на Бернардо Бертолучи и „Таксист“ на Скорсезе, кој ја освои Златната палма.
Неговата посветеност на улогите стана легендарна, при што, продолжувајќи ја соработката со Скорсезе научи да свири на саксофон за „Њујорк, Њујорк“, да вежба бокс и се здебели 30 килограми за „Разгневениот бик “, што беше негова лична идеја и што му донесе Оскар за најдобар актер. Во 1984, Де Ниро дојде во Кан со „Беше еднаш во Америка“, последниот филм на Серџо Леоне. Во 1990-тите глумеше и во „Џеки Браун“ на Квентин Тарантино, хит-комедијата на Џеј Роуч „Запознај ги родителите“.
По 11 септември, Де Ниро го основа Филмскиот фестивал Трибека во 2002. Неодамна, стриминг-гигантот ја објави ТВ-серијата со Де Ниро, „Нулта ден“ (Zero Day).
ИЗВОР: sdk.mk
