Фондот за здравствено осигурување повторно е предмет на сериозни забелешки од страна на Државниот завод за ревизија, кој констатира низа системски слабости, пропусти и непродуктивно трошење на јавни средства.
Според најновиот ревизорски извештај, во периодот што се анализира, се исплатени над 5 милиони евра за лекување на осигурени лица во странство – без воспоставена контрола, без мерливи резултати и без воспоставен систем за следење на ефектите од таквите здравствени услуги.
Покрај тоа, Фондот се соочува со сериозни правни предизвици – моментално е тужена страна во 27 судски постапки во земјата, чија вкупна вредност надминува 317 милиони денари. Најголемиот дел од тужбите се поднесени од приватни здравствени установи, кои бараат исплата на средства за услуги над договорениот надоместок. Дополнително, 12 тужби се поднесени од германска болница за нецелосно платени фактури, во вкупен износ од над 25 милиони денари.
Државен завод за ревизија:
„По добиен наод и мислење од извршено вештачење и правно мислење од адвокатска канцеларија, доставени се повеќе информации до Владата и започната е комуникација со болницата. Во досегашниот период, девет тужбени барања од болницата се усвоени од германскиот суд, а за четири од нив Фондот има поднесено жалба“, се наведува во извештајот на Државниот завод за ревизија.
Особено загрижува состојбата со информатичката инфраструктура. Ревизорите укажуваат дека ИТ-системот на Фондот е застарен, небезбеден и нецелосно функционален. Недостигот од стратешка ИТ-документација, квалификуван кадар и соодветна заштита резултирале со сериозен инцидент – сајбер напад во февруари 2023 година, кој довел до привремено парализирање на дел од здравствениот систем.
Државен завод за ревизија:
„Од страна на Фондот не е навремено постапено по добиените препораки, што во февруари 2023 година резултира со сајбер напад, по кој ИТ-системот е вон употреба и е оневозможен пристап до дел од податоците, со што е нарушено работењето на Фондот, а со тоа се загрозени и функционирањето и стабилноста на целиот здравствен систем на државата.“
Дополнителни слабости се евидентирани и во процесот на препишување и издавање лекови што паѓаат на товар на Фондот. Имено, се користат повеќе софтверски решенија – ИТ-системот на Фондот, „Мој Термин“, системите на матичните лекари и аптеките – кои не се интегрирани, што создава ризик од технички и административни грешки.
Во периодот од 2021 до 2023 година, извршени се вонредни проверки кои откриле вкупно 65.609 спорни рецепти со вредност од околу 6 милиони денари. Се работи за дупликати, рецепти без број или со невалиден број – пропусти што укажуваат на сериозен системски проблем.
Извор: 24vesti.mk
