НЕВШЕХИР (АА) – Небото над турска Кападокија, дестинација како од бајките, го обоија живописните балони на топол воздух, дел од фестивалот „Културен пат“ што привлече учесници од целиот свет, јавува Анадолу.
На фестивалот, организиран од Министерството за култура и туризам, прикажани се спектакуларни балони на топол воздух што лебдат над самовилските оџаци во регионот.
Со појавата на првите светлосни зраци посетителите на фестивалот се собраа за да бидат сведоци на визуелен спектакл со уникатни балони од Туркије, Северна Македонија, Австрија, Азербејџан, Белгија, Бразил, Велика Британија, Франција, Германија, Холандија, Литванија, Молдавија, Полска, Португалија, Словачка, Словенија, Шпанија и Швајцарија.
Над 60 балони, меѓу кои и со дизајни на жаба, слон, желка, ракета, срце, волк и ветерница, полетаа од областа Гореме во Невшехир и летаа над долините речиси 45 минути.
Гувернерот на Невшехир, Али Фидан, го истакна значењето на настанот: „Кападокија е главна дестинација за балони на топол воздух. Минатата година во турите со балони летаа 615.000 луѓе, а гледаме 30% зголемување на бројот на патници оваа година во споредба со минатата година.“
Мехмет Халис Ајдоган, претседател на Асоцијацијата на оператори со балони на топол воздух во Анадолија, ја истакна важноста на Кападокија во светот на овој вид балони.
„Кападокија е глобален центар за летање со балони на топол воздух, со 150 балони што летаат дневно во атмосфера слична на фестивалот“, рече Ајдоган, додавајќи дека за неколку години Кападокија ќе биде домаќин на најголемиот фестивал на балони во светот.
Дневните летови со балони во рамките на фестивалот ќе продолжат до 11 август, нудејќи им на посетителите единствена можност да ја искусат магијата на Кападокија од воздух.
Извор: Anadolu Agency (AA)
