Срѓан Јанковиќ и Дејан Драгијевиќ денеска се уапсени под сомнение дека ја убиле Данка Илиќ (2) во Бањско поле. Девојчето, според сомневањата ја удриле со бел автомобил „фиат панда“, а сега се појави и фотографија од тоа возило од камера за видео надзор.
Како што може да се види на фотографијата, таа е направена на 26 март, денот кога исчезна Данка Илиќ, во 13 часот и 35 минути и 35 секунди, објави „Блиц“.
Како што претходно изјави српскиот министер за внатрешни работи, Братислав Гашиќ, мајката Ивана Илиќ со децата дошла во Бањско поле во 13 часот и 10 минути, а децата си играле во дворот, каде ги фотографирала. Во 13:22 часот таа сфатила дека Данка ја нема, па му се јавила на сопругот во 13:41 часот.
„Околу 13 часот и 50 минути мајката барајќи го детето здогледала бел автомобил и маж како стои до него, за што подоцна, при увидот, се испоставило дека е возилото „фиат панда“ во кое се наоѓале осомничените С.Ј. и Д.Д. Според исказот на еден од осомничените, тие биле на работна задача во Бањско поле, каде требало да ја проверат шахтата на улицата Озренска, каде што пристигнале во 13 часот и 20 минути“, изјави Гашиќ.
За потсетување, полицијата во Бор ги уапси вработените во Јавното комунално претпријатие „Водовод“ Бор, Срѓан Јанковиќ (50) од село Лука и Дејан Драгијевиќ (50) од село Злот под сомнение дека ја прегазиле малата Данка Илиќ (2), па го закопале телото на депонија.
Обвинителството во Заечар соопшти дека Јанковиќ и Драгијевиќ се приведени, како и дека се собираат докази за кривична постапка.
Министерот рече дека со сите можни служби и средства пет пати е претресен целиот простор.
По телото на девојчето се’ уште се трага.
Извор: kurir.mk
