Протестен марш под мотото „Стоп за сообраќајното насилство“ ќе се одржи во сабота во Неготино, објавија организаторите на настанот на Фејсбук група посветена на градот. Маршот ќе започне во 14 часот на улица „Маршал Тито“, во близина на семафорите.
– Време е да ја подигнеме свеста за трагедиите што секојдневно се случуваат на нашите улици. Овој протест е повик за промени, порака дека е доста со жртви во сообраќајот. Маршираме за Фросина, за Викторија, за сите кои го загубија животот поради несовесни возачи и нефункционални институции. Секој од нас е потенцијална жртва. Не смееме да дозволиме оваа серија на трагедии да продолжи, се наведува во повикот за учество.
-Организаторите ги истакнуваат и клучните барања на протестот:
-Безбедни улици за сите
-Почитување на пешачките премини и брзинските ограничувања
-Поголема свест за опасностите во сообраќајот
-Строга контрола на возење под дејство на алкохол и дрога
-Најстроги казни за сообраќајните насилници
-Нулта толеранција за оние што возат без дозвола или ги загрозуваат животите на другите
-Одговорност од институциите и крај на заташкувањето на сообраќајните злосторства
– Фросина заслужува правда. Викторија заслужува правда. Сите жртви на сообраќајното насилство заслужуваат правда, порачаа организаторите.
Дополнително, беше објавено дека другарките на Фросина, која трагично загина на „Партизанска“ во Скопје, организираат бесплатен автобуски превоз од Скопје до Неготино и назад за сите кои сакаат да присуствуваат на протестот.
ИЗВОР: ТВ 21
