Прогласена тридневна жалост во Грција по железничката несреќа

Во Грција до петок е прогласена национална жалост, знамињата на сите јавни објекти ќе бидат на половина копје, а одложени се сите јавни настани

Грчкиот премиер Киријакос Мицотакис од денеска до петок прогласи тридневна жалост во Грција по железничката несреќа кај Лариса во која најмалку 36 лица го загубија животот. Во несреќата се повредени 66 лица кои се хоспитализирани, а шест од нив се на одделот за интензивна нега.

Знамињата на сите јавни објекти ќе бидат на половина копје, а одложени се сите јавни настани.

Претседателката Катерина Сакеларопулу рече дека ја прекинува посетата на Молдавија за да се врати во Грција по железничката несреќа.

„За жал, морам да ја прекинам мојата посета за да бидам блиску до мојот народ, да ги поддржам оние на кои тоа им е потребно“,

рече таа на прес-конференција во главниот град на Молдавија, Кишињев.

Таа изрази сочувство до оние што ги загубија своите најблиски во оваа катастрофа.

„Дури и во овој момент трае операција за спасување животи за да им се помогне на оние што се во возот на смртта“,

додаде таа.

Во меѓувреме акцијата за спасување на патниците од возот сè уште трае.

Еден од спасувачите кој веднаш пристигнал на местото на несреќата ја опишал катастрофата што ја затекнал.

„Ситуацијата беше трагична бидејќи имаше многу загинати, од еден по полноќ ги вадевме само мртвите. Повредените успеаја да избегаат од вагонот во првите час и половина по несреќата, а потоа само ги вадевме мртвите. 80 отсто од патниците беа млади, до 30 години“,

рече тој.

Несреќата се случи кусо пред полноќ, кога од засега непознати причини се судрија товарен и патнички воз во близина на месноста Темпи кај грчкиот град Лариса.