Културните работници незадоволни од доскорешниот нивни колега а сега министер за култура и туризам, Зоран Љутков. Голем број на директори по јавните установи од областа култура одбиваат да дадат задолженија за пресметка на плати согласно барањата на министерот Љутков.
Од ЈОУДК “Бранд Петрушев” Богданци со допис до министерот Љутков дека доставениот образец за Решение за пресметка на плата е неприфатливод причина што истото не е во согласност со законот и колективните договори. Потенцираат дека се до добивање на конкретни насоки, проследени со точна формула за пресметка на платите нема да се изврши пресметка на платите за месец март годинава.
„Јас како директор не можам да барам извршување на работни обврски, изготвување на нови решенија и пресметка на плата, од страна на вработените кои не се темелат на јасни насоки и без официјален писмен допис, со што би ги изложувал на евентуална одговорност во иднина. Нема никакви јасни насоки на кој начин треба да бидат поништени решенијата за плата донесени врз основа на насоките дадени на 10.04.2025 година на мејл адреса. Со пресметка на плата на овој начин, има закана и предупредување од страна на Синдикатите дека јас како директор би бил изложен на тужби за надомест на штета“. – се вели во дописот на ЈОУДК “Бранд Петрушев” Богданци до министерот за култура и туризам, Зоран Љутков.
Од СКРМ велат дека почната е исплатата на плати но потегот е неприфатлив бидејќи е во спротивност со колективните договори па поради тоа ќе се бара и судска разрешница.
Од Министерството за култура и туризам велат дека Исплатата на платите за вработените во институциите од областа на културата во координација со Министерството за финансии е во тек и ќе заврши денеска, но и дека дел од институциите веќе ја добија својата плата.
„Го потврдуваме ставот дека социјалниот дијалог со Синдикатот мора да продолжи. Министерството ќе упати покана за официјална средба со претставниците на Синдикатот, со намера да ги разгледаме сите отворени прашања, во духот на заемна почит и партнерство. Дијалогот мора да продолжи, бидејќи само така можеме да изнајдеме долгорочни решенија за стабилноста на културните институции и достоинството на културните работници.“ – велат од Министерство за култура и туризам.
Претседателот на СОНК, Јаким Неделков ги повика директорите на институциите да не постапуваат според упатставата на Минисетрство за култура. Доколку не се постигне договор со култура, СОНК не ја исклучи и можноста за штрајк.
Извор: 24vesti.mk
