Во Прилеп се одржа петтиот меморијален меѓународен турнир во пинг-понг „Илија Карески – Каре“, настан кој веќе прераснува во значајна спортска традиција и симбол на заедништво и спортски дух.
Турнирот, во организација на Пингпонгарскиот клуб „Младост 96“, со поддршка од Пингпонгарската федерација на Македонија и Општина Прилеп, е посветен на ликот и делото на Илија Карески – Каре, оставајќи траен белег во локалната спортска заедница.
Градоначалникот на Општина Прилеп, Дејан Проданоски, истакна дека е горд што градот повторно е домаќин на спортисти од земјата и од странство, кои преку фер-плеј, посветеност и спортски дух ја збогатуваат оваа манифестација.
„Прилеп отсекогаш бил град на спортот, а ваквите настани дополнително ја зацврстуваат нашата позиција како центар на спортски случувања во регионот“, нагласи Проданоски.
Тој упати благодарност до организаторите, поддржувачите и сите учесници кои придонесуваат турнирот да се одржува на високо ниво, посакувајќи им на натпреварувачите успешни мечеви, фер и коректна игра.
Меморијалниот турнир „Илија Карески – Каре“ и оваа година обедини бројни љубители на пинг-понгот, потврдувајќи дека спортот останува важен фактор за поврзување и промоција на вистинските вредности.
