Градоначалникот на Прилеп, Дејан Проданоски, соопшти дека се исплатени субвенциите за реколтата од 2025 година за тутунопроизводителите, во вкупен износ од над 2 милијарди денари, наменети за повеќе од 15.000 корисници низ државата.
Тој нагласи дека оваа мерка претставува значајна поддршка за земјоделството, особено за тутунарството како една од клучните стопански гранки што со децении има големо влијание врз економскиот развој на Прилеп и прилепскиот регион.
Според податоците, околу 10.000 корисници, односно тутунопроизводители, се од овој регион, што, како што истакна Проданоски, јасно ја потврдува улогата на Прилеп како препознатлив центар на тутунопроизводството во државата.
Исплатата, како што посочи тој, значи финансиска сигурност за земјоделците, полесно планирање на идното производство и дополнителен поттик за развој на руралните средини.
Проданоски додаде дека локалната самоуправа останува посветена на поддршка на земјоделците и на сите иницијативи што придонесуваат за стабилни приходи и одржлив развој на земјоделството во општината.
