По повеќе од шест часа во Основниот суд Тетово, судијата, заедно со претставници од Центарот за социјална работа и јавниот обвинител, донесе одлука за определување мерка притвор за малолетниот Л.М. од село Гајре, под сомнение дека е соучесник во убиство. Обвинителството побара притвор и за уште три лица.
„Издадена е наредба за спроведување истражна постапка против осомничените за убиство според член 123, за неовластено производство и поседување оружје и за тешки кривични дела против јавната безбедност. Едно дете, исто така, се сомничи за истите дела како соучесник, согласно Законот за правда за децата. Издадена е и наредба за истрага против две лица осомничени дека сториле кривично дело – обид за убиство, како и производство, поседување, посредување и тргување со неовластено оружје и експлозиви, како и тешки кривични дела против јавната безбедност“, додаваат од ЈО.
ТВ21 дознава дека лицата за кои е издаден притвор се З.М. и М.Т., додека Р.Т., кој беше повреден за време на пресметката, се наоѓа во Клиничката болница „Мајка Тереза“ под безбедносен надзор.
„На 10 август, на улицата „Благоја Тоска“ во Тетово, првоосомничениот и детето во судир со законот, родено во 2010 година, намерно, како соучесници и со употреба на огнено оружје – автоматска пушка, која е забранета за граѓаните, го лишиле од живот едно лице и ја загрозиле безбедноста и животот на други лица, вклучувајќи и еден од другите осомничени. Со автоматската пушка испукале неколку куршуми кон возило „Голф“, при што го погодиле сега починатиот, кој се наоѓал на возачкото место. Два куршума завршиле во градниот кош на совозачот, кој добил тешки телесни повреди со сериозен ризик по животот. Еден куршум завршил во десното бедро на дете родено во 2012 година, кое случајно се наоѓало во непосредна близина. По нападот, осомничениот заедно со детето во судир со законот го напуштиле местото на настанот“, велат од ЈО.
Обвинителството објави дека за сите осомничени, вклучувајќи го и малолетникот, е предложен притвор.
ИЗВОР: ТВ 21
