Евгениј Пригожин, шеф на приватните руски воени сили „Вагнер“ изјави дека им наредил на своите платеници да го прекинат походот кон Москва и да се повлечат во своите теренски кампови во Украина за да избегнат пролевање на руска крв.
Објавата уследи по соопштението од кабинетот на белорускиот претседател Александар Лукашенко во кое се вели дека тој преговарал со Пригожин, откако претходно разговарал за ова прашање и со Путин.
Пригожин се согласил да го запре напредокот во предложеното решение кое содржи безбедносни гаранции за трупите на „Вагнер“, соопшти кабинетот на Лукашенко.
Шефот на „Вагнер“ го прифатил предлогот на белорускиот претседател Александар Лукашенко да го запре конвојот на околу 200 километри пред Москва и да ја деескалира ситуацијата.
Западните медиуми јавуваат дека силите на „Вагнер“ почнале да го напуштаат Ростов на Дон – јужен руски град кој денеска беше центарот на вооружениот бунт, а освен тоа, приврзаниците на Пригожин ги презедоа и воените институции во Воронеж и влегоа и во Липецк, кој е на околу 350 километри од Москва.
На рутата на движење на припадниците на „Вагнер“ кон руската престолнина имаше жестоки судири со руската армија.
Претседателот Владимир Путин претходно денеска во телевизиско обраќање рече дека „вооружениот бунт“ на платеничките сили е предавство и дека акциите за заштита на татковината од таква закана ќе бидат жестоки. Ниту еднаш експлицитно не го спомна Пригожин.
За време на денешните настани, Москва презема антитеористички мерки. Влезот и излезот од руската престолнина е забранет.
Извор: 360stepeni.mk
