Претседателката на Либерално-демократската партија Моника Зајкова вели дека партијата дејствува независно и оти тоа може да се заклучи од поднесените закони на ЛДП, од стенограмите, излагањата и гласањата во Собранието.
На новинарско прашање зошто нема писмено известување за независното дејствување на ЛДП, која на изборите во мај настапи во коалиција предводена од СДСМ, Зајкова одговори дека јасно и видливо дека „ЛДП дејствува независно бранејќи ја својата либерално-демократска политика“.
Внатрепартиските превирања во ЛДП почнаа откако иницијативниот одбор за реформи упати критика за според нив непринципиелната и погрешна политика на претседателката Зајкова да биде дел од власта и наместо почитување на интересот и желбата на граѓаните има само остварување на желбите и интересите на раководството на партијата.
Иницијативниот одбор за реформи и промени во ЛДП утре ќе најавува трибина во Битола. Зајкова неодамна во изјава за ТВ 24 посочи дека Централниот одбор на партијата веќе заседавал и дека идните чекори биле договорени, но и дека мора да има одговорност за лошите наративи и прозивки упатени кон неа а доаѓаат од одредени сопартиици но и лица кои како што рече немаат врска со партијата.
Она што е актуелно деновиве на политичката сцена е наметнувањето на прашањето дали владата со ваквите коалициски превирања кај одредени опозициски партии може да стигне и до двотретинско мнозинство откако претходно и Мендух Тачи го напушти европскиот фронт, а Зајкова веќе најавуваше дека е спремна да даде поддршка на Мицковски околу идејата за уставни измени со одложено дејство или тоа да биде државен став и позиција.
Извор: 24vesti.mk
