Дали чекањето вистинска и ефективна работа од обвинителствата и судовите е нешто слично на чекањето на Годо?
Чекаме и никако да дочекаме агилност, иницијатива и засилена активност на јавните обвинителства(Државно, организиран криминал, скопско и вишото во Скопје). Многу се троми, ексофицио постапувањата(по чуен глас) им се еднакви на нула. Не, нема и нема резултати. Наместо да откриват криминал и сторители на истиот тие премногу се бават со самите себе, со византиските игри во овие институции, а кога ќе чујат зголемување на плата – да сите се за тоа, па дури и за плати од 5000 евра. Каква лакомост, невидена незаситност за пари.
Мојата оценка за работата и резултатите на овие обвинителства е многу негативна. Воопшто не покажуваат јавно обвинителска решеност за истражување, откривање и гонење на сторениот организиран криминал во Република Македонија. Истото се однесува и за сторителите на тој и таков криминал. Нивното процесуирање е многу бавно, неефикасно па дури не покажуваат ниту почетни резултати.
Како држава и општествена заедница мораме да расчистиме докрај со високо профилните кривични предмети кои долго време се во јавнообвинителска обработка(скриене во некои фиони или по старински јавнообвинителски долапи). Мислам на институционалната корупција и организираниот криминал сторени од високо позиционирани политичари(без разлика која е нивната политичка профилација), припадници на бизнис секторот и луѓе од македонското криминално и мафијашко подземје. Без тоа нема одење напред во смисла на развој на демократијата и плурализмот, нема раст на економијата и заштитата на човековите права е на многу ниско ниво.
За таа цел потребна ни е јуридизација на политиката-ставање на политиката во законски рамки. И што е уште поважно, секое излегување од тие законски рамки, да биде соодветно казнето. А за такво нешто ни требаат промени во обвинителството и судството. Неопходни ни се нови обвинители со ефикасна јавно обвинителска експертиза и нови судии – стручни, објективни и со судска етика. Тоа значи “на клоци“ да ги истераме кронизмот, непотизмот и корупцијата од обвинителствата и судовите, за da се направи место на чесноста, дигнитетот и совеста од една страна, и за стручноста, непристрасноста и објективноста, од друга страна. Ако ова го постигнеме, тогаш и не е битно дали ќе дојде јавнообвинителскиот и судски Годо, бидејќи ќе им се израдуваме на право, законие, правда и правдина, во вистинска смисла на зборовите.
Сотир Костов
Извор: kurir.mk
