Ситуацијата со пожарите предизвика политичка пресметка меѓу власта и опозицијата. Од ВМРО-ДПМНЕ тврдат дека пожарите не настануваат сами по себе или како резултат на високите температури, туку се предизвикани од човечки фактор. Пратеникот Бране Петрушевски посочи дека се појавило видео на кое се гледа маж како пали оган во Делчево, а потоа го напушта местото.
„Фактот што СДСМ со чудна радост со денови се фалеше со пожарите, сугерира дека се работи за сценарио, иако институциите реагираа како никогаш досега. Сето ова се должи на дополнителната опрема и високата мотивација. Планот на СДСМ за хаос пропадна, особено во Скопје, каде што подметнувачите на пожари беа далеку побројни, па излегоа на прес-конференции со пароли дека менаџментот е лош“, изјави Бране Петрушевски од ВМРО-ДПМНЕ.
Од СДСМ, пак, ваквите обвинувања ги нарекоа лудост.
„Поголема лудост, мислам, не може ни да се слушне, ни да се замисли! Зошто? Сетете се дека од моментот кога е формирана владата на ВМРО-ДПМНЕ секогаш се пласираат теории на заговор: ќе има дестабилизација на државата на есен, ќе се организира дестабилизација на пролет и така натаму. Можеби ова беше интересно за граѓаните на почетокот на формирањето на владата, но сега, по една година и неколку месеци владеење, се бара решение, нема повеќе одложување на проблемите на граѓаните“, изјави Оливер Спасовски од СДСМ.
Двете страни апелираат до институциите да дејствуваат уште поригорозно кон сите што палат пожари, а овие катастрофи да не се користат за политички поени од ниту една страна.
Во врска со пожарите, Министерството за внатрешни работи соопшти дека има неколку приведени на лице место.
ИЗВОР: ТВ 21
