Полска тврди дека белоруски хеликоптери го нарушиле нејзиниот воздушен простор

Во врска со инцидентот, полскиот министер за одбрана свика состанок на Комитетот за национална безбедност и одбранбени прашања и нареди зголемување на бројот на војници на границата со Белорусија

Министерството за одбрана на Белорусија, пак, ги отфрли тврдењата за нарушување на полскиот воздушен простор од страна на два белоруски хеликоптери, оценувајќи ги наводите на властите во Варшава како измислени

Полското министерство за одбрана соопшти дека два белоруски воени хеликоптери кои изведувале вежби во близина на границата меѓу двете земји вчера во нарушиле воздушниот простор на Полска, јавуваат светските агенции.  

Министерството во соопштението наведува дека претставникот на Белорусија во Варшава ќе биде повикан во министерството за надворешни работи на Полска за да ги објасни околностите на инцидентот, пренесува регионалниот сервис на Радио Слободна Европа (РСЕ). 

Од министерството појаснуваат дека хеликоптерите влегле во полскиот воздушен простор на многу мала надморска височина, поради што било тешко да се детектираат. Поради тоа, се наведува, во претходно соопштение на полската армија било кажано дека хеликоптерите не го нарушиле воздушниот простор на земјата-членка на НАТО. 

Во врска со инцидентот, полскиот министер за одбрана свика состанок на Комитетот за национална безбедност и одбранбени прашања и нареди зголемување на бројот на војници на границата. Исто така, полските власти издвоија дополнителни ресурси, меѓу кои и борбени хеликоптери.  

За инцидентот, како што е соопштено од полиските власти информиран е и НАТО.  

Министерството за одбрана на Белорусија, пак, ги отфрли тврдењата за нарушување на полскиот воздушен простор од страна на два белоруски хеликоптери. 

Белоруското министерство на Телеграм објави дека тие се измислени од полското воено-политичко раководство „за да се оправда уште едно зголемување на силите и ресурсите во близина на границата со Белорусија“, пренесува РСЕ, повикувајќи се на новинската агенција АФП. 

 Полска, Литванија и други земји од источното крило на НАТО изразија загриженост за потенцијалната закана од Белорусија, која сега е домаќин на илјадници војници кои припаѓаат на платеничката група „Вагнер“. 

Платениците поврзани со Русија пристигнаа во Белорусија по краткотрајниот бунт на групата во Русија кон крајот на јуни. Припадниците на „Вагнер“, кои одиграа клучна улога во руската инвазија на Украина, почнаа со обука на механизирани единици на белоруската армија минатата недела, објави Министерството за одбрана на 30 јули. 

Полскиот премиер Матеуш Моравјецки на 29 јули изјави дека група од „100 вагнерски платеници“ во Белорусија се приближиле до полската граница, нарекувајќи го „чекор кон понатамошен хибриден напад на полска територија“.