Полска од полноќ воведува контроли на границата со Германија во обид да го спречи протокот на мигранти, пренесува ДПА.
Портпаролот на полската гранична полиција Конрад Швед за новинската агенција ПАП изјави дека проверките ќе бидат фокусирани на автобуси, минибуси и автомобили кои превезуваат повеќе патници, како и на возила со затемнети стакла.
Полските власти ќе спроведуваат контроли и по должината на литванската граница.
Швед рече дека нема да има физички бариери на 52-та гранични премини со Германија и на 13-те со Литванија, но ќе бидат поставени знаци што ќе им наложуваат на возилата да забават, а сообраќајните ленти ќе бидат стеснети.
– Во случај на контрола на возилото, ќе бидат проверувани документите на возачот и патниците, како и багажникот. Од оние што ја преминуваат границата се очекува да имаат лична карта. Ќе бидат преземени и мерки за да се осигури дека луѓето што живеат во пограничните области, вклучително и оние кои патуваат преку границата за работа, да не бидат изложени на непријатности, посочи Швед.
Варшава воведува проверки на германската граница како одговор на претходно преземените мерки од Германија за блокирање на нерегуларната миграција на граничната линија со Полска.
Германија спроведува проверки на полската граница од октомври 2023 година. Германскиот министер за внатрешни работи Александар Добриндт по преземањето на функцијата во мај годинава, најави дека контролите ќе бидат засилени и дека барателите на азил би можеле да бидат враќани на границата со Полска.
Германската влада се надева дека по воведувањето на полските гранични проверки ќе нема прекини во сообраќајот. Во тек се структурни прилагодувања на патиштата меѓу Германија и Полска, за да се олесни сообраќајот на границата.
Извор: 24vesti.mk
