Почина Френк Стела, сликар, скулптор и графичар чии дела кои постојано се развиваа се сметаат за обележја на минималистичките и постсликарските апстракциски уметнички движења. Почина вчера во својот дом на Менхетен, на 87 години. Сопругата на Стела, Хариет Мекгурк, изјави дека починал од лимфом.
Роден на 12 мај 1936 во Малден, Масачусетс, Стела студирал на Универзитетот Принстон пред да се пресели во Њујорк во доцните 1950-ти. Во тоа време многу истакнати американски уметници го прифатија апстрактниот експресионизам, но Стела почнал да го истражува минимализмот. На 23-годишна возраст создаде серија рамни, црни слики со ленти и пруги слични на решетка користејќи фасадна боја и експонирано платно, што привлече широко признание од критиката. Во текот на следната деценија, делата на Стела ја задржаа неговата ригорозна структура, но почнаа да инкорпорираат заоблени линии и светли бои, како на пример во неговата влијателна серија „Агломер“, именувана по алатката за геометрија што ја користеше за да ги создаде заоблените форми на сликите во големи размери.
Во доцните 1970-ти, Стела почна да додава тродимензионалност во неговата визуелна уметност, користејќи метали и други мешани медиуми за да ја замати границата помеѓу сликарството и скулптурата. Стела продолжи да биде продуктивен и во своите 80-ти години, а неговите нови дела моментално се изложени во галеријата „Џефри Дајч“ во Њујорк. Шарените скулптури се масивни, а сепак изгледаат речиси како да лебдат, составени од сјајни полихроматски ленти кои се вртат и се намотуваат низ просторот.
„Сегашните дела се зачудувачки“, изјави вчера Дајч. „Тој чувствуваше дека делата што ги покажа се кулминација на повеќедеценискиот напор да се создаде нов сликовен простор и да се спојат сликарството и скулптурата“.
ИЗВОР: sdk.mk
