Македонската јавна сцена и новинарската заедница изгубија еден од своите најавтентични ликови. На 64-годишна возраст, под долго боледување, почина Рамуш Муарем – Цирко, новинар, уредник, актер и еден од најгласните активисти за правата на Ромите.
Муарем остави неизбришлива трага во медиумскиот простор, а неговото име засекогаш ќе остане синоним за култната емисија „Циркотека“, која се емитуваше на телевизијата БТР. Преку ова шоу, Цирко успеа да допре до широката публика со својот специфичен хумор, спонтаност и бројни гафови кои и денес, години подоцна, се вирални на социјалните мрежи.
Веста за неговото заминување предизвика лавина од емотивни пораки на социјалните мрежи. Меѓу оние кои јавно се збогуваа е и Габриел Бајрам, кој истакна дека Цирко бил човек кој ширел надеж дури и во најтемните времиња.
Освен по телевизиската популарност, Рамуш Муарем беше исклучително почитуван како активист кој неуморно се бореше за правата и подобрата позиција на ромската заедница во државата. Неговата посветеност на поврзувањето на луѓето и борбата за еднаквост остануваат во аманет на идните генерации.
Македонското новинарство изгуби професионалец со уникатна енергија, а ромската заедница еден од своите најсилни гласови.
Извор: zurnal.mk
