Каква лудница на „Хил Дикинсон“ ни приредија Евертон и Манчестер Сити. Натпревар во кој двата тима одиграа по едно брилијантно полувреме и кој на крајот заврши со нерешен резултат 3:3. Момците на Пеп Гвардиола беа пред работ на бездната, но во последните секунди од мечот успеаја да се спасат и да останат во трката за титулата.
Сити влезе во натпреварот со императив за победа и очекувано доминираше на теренот. Шансите пред голот на Пикфорд се редеа, а мрежата конечно се затресе во 43-тата минута кога Жереми Доку постигна маестрален погодок. Во вториот дел улогите се сменија. Се чинеше дека Евертон е тимот кој се бори за титула, а Манчестер Сити ја чуваше предноста стекната во првото полувреме. Домашните фудбалери „летаа“ по теренот и за само 12 минути постигнаа 3 погодоци и им зададоа голем удар на „граѓаните“ во битката за титулата. Најпрво стрелаше резервистот Бари во 68-та минута, а потоа О’Брајен и Бари повторно ја тресеа мрежата на немоќниот Донарума. Само една минута по третиот гол за Евертон, Халанд излезе сам пред голманот и погоди за намалување на резултатот. До крајот на мечот гостите притискаа и толку посакуваниот гол пристигна дури во 98-та минута кога Доку со уште еден брилијантен гол му донесе реми на Манчестер Сити.
Со ова реми Сити останува на втората позиција со 71 бод, 5 помалку од првопласираниот Арсенал, а Евертон се наоѓа на 10-тото место со 48 бода.
Извор: vecer.mk
