Тоше Поп-Симонов, еден од најзначајните композитори, продуценти и аранжери во современата македонска музика, почина на 63 години.
Поп-Симонов ја почна својата музичка кариера во 1980-тите, при што беше еден од основачите и гитарист на култната рок група „Бастион“, а потоа и гитарист на рок групата „Асторија“.
Поп-Симонов остави особено длабока трага во македонската музика во 1990-тите, кога повеќе се посвети на работата во студио, соработувајќи со речиси сите познати имиња од поп, рок, па и фолк сцената. Меѓу другите, ги промовираше Ена Веко и „Студени нозе“, што беше негов продукциски проект.
Како композитор, снимател, продуцент или аранжер, Поп-Симонов работеше на албуми и синглови на „Мизар“, Владо Јаневски, „Меморија“, Дарио, „Силви бенд“, „Анастасија“, Дуле и Коки, „Куку леле“, Верица Пандиловска и бројни други.
Реагирајќи на веста за смртта на својот долгогодишен соработник и пријател, Дарио Панковски ни изјави дека тој токму во негова чест настапил на последната „Златна бубамара на популарноста“.
„Многу ме потресе веста за заминувањето на Тоше. Требаше заедно да настапиме на ‘Златна бубамара‘, но тој мораше да откаже од здравствени причини. Тој ги напиша ‘Дупла вотка‘ и ‘Дај да заспијам‘ и тогаш настапив во негова чест“, рече Панковски.
ИЗВОР: sdk.mk
