Џејмс Ерл Џонс, американскиот актер кој го надмина проблемот со пелтечење во детството за да стане еден од најпрепознатливите гласови на филмот, почина на 93 години во својот дом во Лос Анџелес. Џонс долго време боледуваше од дијабетес, но причината за смртта не беше објавена.
Џонс беше импозантна појава во театар, филм и на телевизија, но тој ќе беше ѕвезда дури и ако неговото лице никогаш не беше видено. Неговиот бас глас беше доминантен во сите проекти во кои што учествуваше, дали како Дарт Вејдер во „Војна на ѕвездите“, Муфаса во „Кралот лав“ или во бројните улоги во драмите на Шекспир.
Во текот на кариерата, Џонс доби три награди Тони, две награди Еми, еден Греми, а еднаш беше номиниран за Оскар. Во 2012 година му беше доделен почесен Оскар.
Роден во Мисисипи во јануари 1931, Џонс не бил во можност да збори во најголем дел од детството поради пелтечењето. Тој подоцна откри дека го развил својот славен глас додека работел на тоа како да се справи со пелтечењето.
Актерската кариера ја почнал во 1950-тите, а првата позначајна улога ја имал во „Доктор Стрејнџлав“ на Стенли Кјубрик. Иако во 1971 стана вториот црн актер номиниран за Оскар, тој се прослави со гласот на Дарт Вејдер во серијалот „Војна на ѕвездите“, иако подоцна кажа дека за првиот филм бил платен само 9.000 долари и на негово барање воопшто не бил ставен на шпицата. Тој ја репризираше оваа улога неколкупати, последно во 2019, иако секој пат друг актер беше во костумот.
Џонс исто така оствари успешна кариера на телевизија и во театар, каде што одигра бројни легендарни ликови од драмите на Шекспир, како Отело и кралот Лир. Неговиот глас можеше да се слушне и во десетици телевизиски реклами, како и во неколку епизоди на анимираната серија „Симпсонови“.
ИЗВОР: sdk.mk
