Кочанчани ја добија битката. По 17 дневен протест и 24 часовна блокада на патот кој води кон градската депонија, Советот на Општина Кочани на денешната редовна седница донесе едногласна одлука отпадот од Виница, Зрновци, Чешиново-Облешево, но и другите општини во регионот повеќе да не се носи на градската депонија кај кочанското село Бели сè до отпочнување со работа на регионалната депонија во Светиниколско Мечкуевци.
На седницата едногласно беше усвоена и инцијатива да се формира надзорно тело кое ќе врши надзор на начинот на собирање и депонирање на сметот на територијата на општина Кочани.
Учесниците на протестот пак, се задоволни од донесените одлуки на денешната Седница на Совет.
За тоа како граѓаните реагираа изминатите денови на депонијата што собираше отпад и од други градови, притоа предизвикувајќи опасност по нивното здравје и животна средина се говореше и во емисијата 24 Отворено.
Инаку, попладнево граѓанските активисти кои изминатите речиси три седмици го блокираа пристапот до депонијата ќе одржат состанок на кој ќе ја разгледаат новонастанатата ситуација и ќе донесат одлука дали протестот ќе биде прекинат.
Извор: 24vesti.mk
