По протестите, Грузија ќе го повлече законот за „странски агенти“

Гледаме дека предлог-законот доведе до несогласувања во општеството. Со оглед на сето ова, одлучивме да го повлечеме предлог-законот што го поддржуваме без резерва, соопштуваат од „Грузиски сон“

Грузиската владејачка партија соопшти дека ќе го повлече нацрт-законот за „странски агенти“, откако во главниот град имаше масовни протести и широки меѓународни критики.

Во соопштението на партијата стои дека безусловно го повлекуваат предлог-законот поради потребата да се намали конфронтацијата во општеството.

„Гледаме дека предлог-законот доведе до несогласувања во општеството. Со оглед на сето ова, одлучивме да го повлечеме предлог-законот што го поддржуваме без резерва“,

соопштуваат од „Грузиски сон“.

Би-би-си пренесува дека и делегацијата на ЕУ во Грузија потегот за отфрлање на законот го оцениле како „најава за добредојде“ и ги охрабрува политичките лидери да продолжат со реформите.

Неколку дена , илјадници демонстранти излегоа на улиците во Тбилиси и го искажуваа револтот од ваквиот предлог-закон.

Предлог-законот доби голем број критики од општеството, медиумскиот сектор и аналитичарите, кои сметаа дека претставува „закана за грузиската демократија“. Критичарите и опозицијата го споредуваат нацрт-законот со рускиот закон од 2012 година кој потоа почна да го проширува опсегот и да се користи за сузбивање на независното граѓанско општество и медиумите.

И грузиската претседателка Саломе Зурабичвили најави дека ќе стави вето на законот бидејќи смета дека тој ќе ги уништи надежите за влез во ЕУ и НАТО.

Протести пред парламентот на Грузија имаше и вчера, а полицијата употребила солзавец, водени топови и шок-бомби во обид да ги растера демонстрантите. Стотици полицајци, од кои многумина носеле безбедносни штитови, се собрале на улиците околу зградата на парламентот во обид да ги разбијат протестите.

Облаците од солзавец принудиле барем дел од илјадниците демонстранти да се оддалечат од парламентот.

Неколку десетици луѓе претходно ја пробиле металната бариера подигната на одредено растојание од парламентот, но не покажале знаци дека се обидуваат да влезат во зградата на законодавниот дом на Грузија.

Предлог-законот предвидуваше дека организациите кои од странство ќе добиваат повеќе од 20 отсто од својот буџет, треба да се регистрираат како „странски агенти“ и да подложат на мониторинг од страна на Министерството за правда или, во спротивно, ќе се соочат со високи казни.

Според нацрт-законот, невладините групи и медиумите ќе бидат цел на напади доколку преземат 20 отсто од финансирањето од странство.

Владејачкиот блок во Грузија, коалицијата „Грузиски сон“, минатиот месец објави дека ќе го поддржи законот за странски агенти, а опозицијата жестоко се противеше.