Над 20 години зборуваме за интеграција на Западниот Балкан во ЕУ, но не е постигнат значителен напредок на тој план, бидејќи најчесто соседните земји „ставаат кочница”, изјави министерката за Европа, интеграција и семејство на Австрија, Клаудија Плаколм во интервју за австриската агенција АПА.
Таа смета дека ЕУ треба да им дозволи на „напредните кандидати за членство“, како Црна Гора, Северна Македонија и Албанија, да учествуваат во програмите на Унијата.
- Тоа може да се случи, на пример, преку подобра економска соработка со видливи придобивки за населението и за компаниите на Западниот Балкан, што, се разбира, е поврзано со исполнување на обврските. Може да се прави чекор по чекор и земјите кои веќе добро напредуваат да се вклучат во европските програми, вели Плаколм.
Австриската министерка истакна дека се надева и посакува ЕУ да ги прими првите нови членки „во следните неколку години, а во секој случај до 2030 година“.
За забрзување на интегративниот процес, според Плаколм, би требало да се разгледа и ограничување на правото на вето при носењето на некои одлуки во рамките на ЕУ поврзани со проширувањето.
- Би било поразумно некои чекори да се направат побрзо и на крајот од целиот процес повторно да се вратиме на одлучување со консензус. Но, сметам дека е важно да постигнеме единство и да разговараме за клучните прашања, истакна австриската министерка.
Според неа, ако продолжи со ваквиот однос, ЕУ ризикува да го изгуби кредибилитетот на Западниот Балкан и постои опасност регионот „да стане играчка на други геополитички сили”.
- Се чувствува, особено кога размислуваме за демонстрациите во Србија, дека населението е подготвено за реформи, за европска интеграција, повеќе од кога било досега и дека сега конечно се потребни опипливи подобрувања. Се гледа дека тоа е поддржано и од младите, од студентите, кои излегуваат на улица и бараат некои работи од политиката, истакна Плаколм.
Таа смета дека давањето статус на кандидат за членство во ЕУ на Украина било геополитичка одлука. – Јасно е дека ние, како Австрија, како Европска Унија, се обврзуваме да ја поддржиме Украина. Зашто тоа е една земја на европска почва нападната на 24 февруари 2022 година и зајакнатото приближување кон нашите европски принципи, кон нашите вредности, може да биде само корисно, рече Плаколм.
Сепак, според неа, дури и ако војната заврши наскоро, Украина нема да биде поподготвена од другите кандидати за да стане членка на Европската Унија.
- Тука Западниот Балкан е значително понапред од Украина, нагласи Плаколм, потенцирајќи дека „за некои земји“ пристапниот процес трае повеќе од 20 години.
ИЗВОР: racin.mk
