Синоќа во Прилеп, заедно со членовите на семејството на Коста Смилески, беше откриена ѕвездата на патеката на познатите прилепчани, посветена на еден од најзначајните музички дејци на градот и македонската култура.
Коста Смилески остави неизбришливи траги во културниот живот на Прилеп преку својата посветеност, талент и љубов кон музиката и театарот. Роден во 1939 година, Смилески студирал во музичкото училиште „Ордан Михајлоски-Оцка“ и на музичката академија во Скопје. Како флејтист, активно настапувал во КУД „Моминок“ и КУД „Мирче Ацев“ и бил еден од основачите на Долненскиот фестивал.
Во 1962 година започнал работа во Македонската радио и телевизија во Народниот оркестар, каде неговиот талент бил награден со прва награда за првенец инструменталист на флејта во Загреб. Смилески е автор и аранжер на повеќе од 300 ора и голем број македонски народни песни, меѓу кои „Зајачко оро“, „Прилепско оро“ и композиции изведувани од Јонче Христоски како „Свирете ми чалгии“ и „Несакам лажна среќа“.
Градоначалникот Дејан Проданоски истакна дека оваа иницијатива ја продолжува традицијата на почит кон заслужните граѓани на Прилеп, која не беше реализирана од 2016 година. „Културата и наследството на големите имиња мораме не само да ги чуваме, туку и да ги пренесуваме понатаму“, рече Проданоски.
Поставувањето на ѕвездата на Коста Смилески е уште едно потсетување дека музиката и културното наследство на Прилеп продолжуваат да живеат низ делата на своите луѓе и дека градот останува посветен на славните личности кои го обликувале неговиот културен идентитет.
