БАРСЕЛОНА (АА) – Шпанската полиција денес уапси пет лица под обвинение за планирање на терористички напади врз владини објекти во земјата, како и врз институции кои ја поддржуваат Украина во неколку европски земји, јавува Анадолу.
Полицијата во Барселона спровела операција во која уапсила двајца Руси и по еден државјанин на Белорусија, Колумбија и Шпанија, под сомнение дека се поврзани со терористичка организација, објавија локалните медиуми.
Сите петмина се опишани како „проруски терористи“ и се обвинети за планирање терористички напади во неколку европски земји, пишува „Ел Периодико“.
Уапсените, наводно, дејствувале по наредба на руски државјанин, чие име не го соопштија ниту полицијата во Барселона, ниту медиумите, и планирале терористички напади врз владите и институциите кои ја поддржуваат Украина, особено во земјите членки на НАТО.
Петмината осомничени ќе бидат изведени пред Националниот суд во Мадрид под обвинение за тероризам и членство во терористичка организација.
Извор: Anadolu Agency (AA)
