СКОПЈЕ (АА) – Претседателот на Северна Македонија, Стево Пендаровски, и претседателот на Собранието, Талат Џафери, упатија честитки до турската заедница во земјата по повод 21 декември, Денот на наставата на турски јазик, јавува Анадолу.
Турската заедница во Северна Македонија го стекна правото на образование на мајчин јазик на 21 декември 1944 година во времето на поранешна Југославија. По осамостојувањето на Северна Македонија, со законска измена на 15 февруари 2007 година, 21 декември се одбележува како Ден на наставата на турски јазик за турската заедница во земјата.
– Пендаровски: Турската заедница е силна врска со братска и пријателска Турција
Во својата честитка претседателот Пендаровски потсети дека на денешен ден во 1944 година започната е наставата на турски јазик во скопското училиште „Тефејуз“, со што, како што истакна, „ослободен е потенцијалот на заедницата, чувајќи го својот идентитет и развивајќи ја својата култура, да придонесува кон општото добро“.
„Корените на денешниов празник ѝ претходат не само на современата македонска држава туку и на современата турска држава. Годинава се одбележуваат 100-годишнината од основањето на Република Турција [Туркије] и 95-годишнината од јазичните реформи и воведувањето на новата турска азбука што за кратко време довеле до масовно описменување“, истакна Пендаровски.
Тој додаде дека турската заедница дава „уникатен придонес кон изградбата и кон развојот на нашата заедничка македонска татковина и збогатувањето на соживотот во македонското мултиетничко, мултијазично и мултирелигиско општество“.
И покрај предизвиците во образованието и во другите области, Пендаровски нагласи дека претставниците на турската заедница во Северна Македонија даваат голем придонес во секоја сфера и затоа „државата мора да ги отстрани и последните пречки за нашите сограѓани Турци да можат без никаков проблем да го остваруваат ова основно човеково право на образование“.
„Освен што со својата лојалност придонесува кон македонска татковина, турската заедница е и силна врска со братска и пријателска Турција. А плодови на тоа пријателство се одличните билатерални односи и заемната поддршка, многубројните инвестиции, заедничките проекти, донациите за образованието, науката, здравството и културата“, вели Пендаровски.
– Џафери: Како сограѓани ја изразуваме нашата заемна почит кон турската култура, идентитет и посебност –
Претседателот на Собранието, Талат Џафери, во името на пратениците и во свое име упати срдечни честитки по повод 21 декември – Денот на наставата на турски јазик до сите сограѓани Турци „кои живеат, творат и придонесуваат во Република Северна Македонија“.
Џафери иста дека турската заедница е додадена вредност во мултиетничкото општество и мултиетничката држава.
„Убеден сум дека овој празник, со кој и институционално, меѓутоа, пред сѐ, како сограѓани, ја изразуваме нашата заемна почит кон турската култура, идентитет и посебност, со посебен акцент на образованието, творењето и негувањето на турскиот јазик, се најдобра инвестиција во иднината на еден народ, а градењето односи на искрена почит, доверба и лојалност кон државата како наш заеднички дом е инвестиција во иднината на државата“, порача Џафери.
Тој нагласи дека тоа може да се постигне „само со подобро запознавање на различностите што нѐ прават уникатни, а сепак сплотени“.
