Васил Јованов – возачот кој ја прегази 22 годишната Фросина Кулакова го добил телефонот од друг притвореник во затворот Шутка. Роднина на Јованов пак дал пари на братот на притвореникот кој му го обезбедил телефонот, ова денеска го соопшти првиот човек на Управата за извршување санкции – Александар Пандов…..Истрагата дополнително треба да откире како телефонот бил внесен во затворот.
Александар Пандов – Директор на Управа за извршување санкции: „Тој што му го дава телефонот е притворено лице, а службено лице односно затворски полицаец е тој што го пренесува во кутија со колачи од една во друга ќелија. Телефонот е платен од член на најтесното семејство на Васил Јованов. Како е влезен телефонот во затворот немаме откриено, но сум оптимист дека и тоа ќе го откриеме. Службеното лице кое што го пренесува таа кутија со колачи ќе биде најстрого санкциониран“.
Постапки најавуваат и од Специјализираното одделение за гонење на кривични дела сторени од лица со полициски овластувања и припадници на затворската полиција при обвинителството.
Обвинителство: „Специјализираното одделение за гонење на кривични дела сторени од лица со полициски овластувања и припадници на затворската полиција при Основното јавно обвинителство за гонење на организиран криминал и корупција ги следи информациите во врска со случувањата во затворот ‘Скопје’ и по добивање на идентитетот на инволвираните лица ќе постапи во рамките на своите надлежности за што јавноста ќе биде навремено информирана“.
Пандов вели дека корупцијата во затворите е повеќедецениска пракса. Најави војна против корумпираните службеници во затворите и најстроги казни и бркање од работа.
Александар Пандов – Директор на Управа за извршување санкции: „Покренати се во овој период над 30 постапки во обвинителство против лица кои работат во затворскиот систем, но за жал морам да потенцирам дека тоа очигледно не е доволно и она што можам да ве уверам е дека од утре ќе има засилени претреси секојдневно со помош на интервентните единици“….
Јованов доби притвор поради опасност од бегство, повторување на делото и влијание во постапката. Според обвинителството, тој бил под дејство на алкохол и без возачка дозвола кога ја прегазил Фросина на пешачкиот премин на „Партизанска“.
Извор: 24vesti.mk
