На денешното судско рочиште за двојното убиство на Вања Ѓорчевска и Панче Жежовски нема да се врши распит на сведокот на обвинителството Гоце Трајковски, соопштија од Јавното обвинителство. Полицијата подолг период го бараше Трајковски кој е осомничен за подметнување на пожар во кафуле во скопската населба Кисела Вода, а кој минатиот четврток сам и се предаде на полицијата.
Трајковски треба да сведочи како доаѓал до снимките од безбедносните камери во случајот со киднапирањето и убиството на Вања Ѓорчевска и како грабнувањето на Вања го поврзал со исчезнувањето на Панче Жежовски кој беше убиен неколку дена пред малолетната Вања.
Љупчо Палевски, прво-обвинетиот за убиството на 14-годишната Вања Ѓорчевска и Панче Жежовски на денешното судско рочиште побара изземање на обвинителката, но и на целото скопско Обвинителство. Тој рече дека обвинетиот Боре Видевски поседува пиштол калибар 9мм, со дозвола издадена 1990 година, поседува и ловечка пушка.
Извор: 24vesti.mk
