Бројни институции и компании во светот, меѓу кои аеродроми, банки, болници и медиумски куќи, пријавиле технички дефекти што им предизвикуваат потешкотии, јавуваат светските медиуми.
Аеродромите во Берлин и Амстердам пријавија технички проблеми што ги одложија летовите, а на патниците им беше препорачано да контактираат со нивните авиокомпании за најнови информации. Британскиот медиум Скај њуз објави дека не може да ја емитува својата утринска програма поради технички дефект.
Поради дефект на софтверот, падна и онлајн-системот на британскиот здравствен систем, a ист проблем е регистриран и во Хрватска.
Бројни други компании ширум светот пријавија слични проблеми.
Летовите се приземјени и на аеродромот во Сиднеј, супермаркетите се соочуваат со хаос за наплата, а телевизиските мрежи се во неред бидејќи графиката и компјутерите се во прекин.
Неколку часа пред Австралија да биде сериозно погодена, неколку авиокомпании во САД исто така објавија дека морале да ги одложат или откажат летовите поради технолошки проблем.
И француската авиокомпанија Ер Франс пријави технички проблеми поради што се откажани дел од летовите.
Причината за прекинот е нејасна, но многу од засегнатите го поврзуваат со оперативните системи на „Мајкрософт“.
-Свесни сме за проблемот што влијае на уредите со Виндоус поради ажурирање од софтверска платформа од трета страна. Очекуваме решение – вели портпаролот на „Мајкрософт“, пренесува Би-би-си.
Извор: kurir.mk
