ДУЗЏЕ (АА)
– Сонер ШЕН
Ферхат Ѓокмен, еден од илјадниците граѓани на Туркије кои ноќта на 15 јули 2016 година излегоа на улиците за да се спротивстават на терористите на ФЕТО кои се обидоа да извршат државен удар, осум години подоцна се потсети на деталите од ноќта во која граѓаните учествуваа во спречувањето на соборувањето на актуелната демократски избрана власт.
Во интервју за Агенција Анадолу, Ѓокмен рече дека тие денови бил во Анкара кај своите роднини кои живеат во турската престолнина.
Како што се присети, кога го слушнал повикот на турскиот претседател Реџеп Таип Ердоган на телевизија упатен до граѓаните да излезат на улиците и плоштадите, видел повеќе тенкови како се движат кон комплексот на Големото национално собрание на Република Туркије.
Воениот рок го отслужил како тенкист, па, како што рече, знаел што може да се направи во тој момент и барем минимално да оневозможи оклопно возило.
„Цивилите се обидуваа да ги запрат тенковите. Знаев дека не можеме многу, но и јас бев меѓу нив. Фрлавме церади на предните делови на тенкот и ги отстранивме нивните продолжетоци, антените за комуникација. Во тој момент наиде воен хеликоптер кој почна да пука. Потрчав кон сестра ми и ќерка и. Видов дека зет ми е ранет. Тргнав да му помагам, но во тој момент тенкот го искористи метежот и тргна напред“, рече Ѓокмен.
„Тенкот ме удри во десното рамо и паднав на тротоарот. Потоа се заглавив меѓу тлото и тенкот. На десната рака сѐ уште имам трага од тенковска гасеница“
Закрепнувањето, рече тој, траело исклучително долго.
„Меѓутоа, дури и никогаш да не закрепнам и да умрам под тенк, никогаш не би ја препуштил татковината на предавниците“, рече Ѓокмен.
Денес, како што вели, гордо го носи орденот Гази (ранет воен ветеран) со кој е одликуван за отпорот кон пучистите.
„Создавачот не одлучил да бидам загинат херој. Многу се гордеам со тоа што сум Гази. Тоа е чест која не е мерлива со ништо на овој свет“, рече Ѓокмен.
– ФЕТО како опасност за сите земји во кои дејствува
Терористичката организација Фетулаџи (ФЕТО) е одговорна за крвавиот обид за пуч во Туркије ноќта на 15 јули 2016 година.
Станува збор за терористичка организација предводена од Фетула Ѓулен, кој живее во Соединетите Американски Држави, чија екстрадиција Туркије официјално побара од САД.
Припадниците на ова терористичка организација со години напредуваа во службата со местење испити, со што се инфилтрираа во институциите на државата. Потоа, прво во декември 2013 година, поддржувачите на ФЕТО инфилтиррани во судството на Туркије, се обидоа да гонат бројни високи функционери со монтирани судски процеси за наводна корупција.
Неколку години подоцна следеше крвавиот обид за државен удар од страна на терористите на ФЕТО, односно обид за државен удар извршен од офицери кои ФЕТО ги инфилтрирал во турската армија.
Истрагата за терористичката организација ФЕТО покажа дека се работи за глобална мрежа која претставува опасност не само за Туркије, туку и за секоја друга земја во која што е активна. Во повеќе наврати на ова укажаа и турските власти.
За време на обидот за државен удар во Туркије, животот го загубија 253 лица, а повеќе од 2.730 луѓе беа повредени.
Извор: Anadolu Agency (AA)
