Нема повеќе дилеми и партиски калкулации. Познати се кандидатите за градоначалник и на ВМРО-ДПМНЕ и на СДСМ. Актуелниот градоначалник на Кисела Вода, Орце Ѓорѓиевски е адутот на владејачката партија, додека поранешната министерка за животна средина Каја Шукова е кандидат на опозициската СДСМ.
-Скопје е модел на град каде сите општини во градот мора синхронизирано и рамномерно да се развиваат, во соработка со градот. Скопје заслужува повеќе. Заслужува да дише. Заслужува да живее. Заслужува да се сака. Заедно ќе работиме, заедно ќе ги носиме одлуките. Ајде да го вратиме заедно сјајот на Скопје, за похуман Центар, Карпош, Кисела вода, Аеродром, Ѓорче Петров, Шуто оризари, Бутел, Сарај, Гази баба, Чаир, изјави кандидатката за градоначалник на Скопје на СДСМ, Каја Шукова.
За ВМРО-ДПМНЕ кандидатурата на Шукова е потврда за пораз на СДСМ. Тие потсетија дека таа е поранешна министерка за животна средина, која во нејзиниот министерски мандат не направила ништо. Затоа прашуваат како ќе ги исполни ветувањата како градоначалничка, кога како министерка не реализирала ништо.
-Шукова која не направи ништо за животната средина, за почист воздух, за управување со отпад и слично. Шукова која во својот министерски мандат од февруари 2023 година само излегуваше во јавност и како да се имаше снимено само повторуваше треба многу време да решиме било кој проблем со животната средина. Ако Шукова ништо не направи како министер за животна средина се поставува прашањето што може да направи како градоначалник на Скопје, посебно вакво Скопје речиси уништено од Данела Арсовска која со право може да се нарече само кума на градскиот хаос, изјави Валентин Манасиевски од ВМРО-ДПМНЕ.
Како што е познато, актуелната градоначалничка Данела Арсовска нема да се кандидира. Останува да се види дали некој ќе се кандидира како независен и дали останатите партии ќе имаат свои кандидати или ќе ги поддржат коалициски партнери.
А, ако се суди според прес конференциите, но и според информациите кои се споделуваат со јавноста, кампањата за градоначалничката фотелја е почната. Ѓорѓиевски сподели информација дека во текот на вчерашниот дел имал средба со приватните автобуски превозници, но и со такси превозниците. Ги слушнал нивните барања и ветува модерен градски јавен превоз.
ИЗВОР: ТВ 21
