Унгарскиот премиер Виктор Орбан денеска изјави дека унгарските аргументи не се земаат предвид при формулирањето на политиката на санкции на Брисел кон Русија, иако самото постоење на земјата зависи од тоа, барем кога станува збор за семејните буџети и успехот на претпријатијата.
Орбан на антиратниот собир во Кечкемет, кој го организираа „Дигитални граѓански кругови“, потсети дека американскиот претседател Доналд Трамп, кога му кажал за време на средбата во Вашингтон дека забраната за увоз на руски енергенти ќе ја уништи Унгарија, му дозволил на Будимпешта исклучок од американските санкции, пренесува MTI.
Тој рече дека одлуката на Брисел да не ја исклучи Унгарија од енергетските санкции кон Русија била лоша, нагласувајќи дека тоа е чекор кој не го земал предвид влијанието врз Унгарија.
Додаде дека Брисел ги квалификувал санкциите против Русија како одлука од трговска политика, која не бара единствено мислење, поради што унгарското противење не било земено предвид, што според него е лошо.
Орбан истакна дека Унгарија мора да собере сила не само за да остане надвор од војната (во Украина), туку и за она што следува по неа.
„Големите земји не мора да бидат многу паметни, но ние мораме. Големите земји се силни, големи и моќни и можат да ги спроведуваат своите интереси дури и ако им треба повеќе време да нешто сфатат. Но земја од наша големина мора да биде проницлива. Мора да се движите напред и да размислувате еден или два чекори пред сите останати… а потоа можете да ги претркате поголемите земји бидејќи сте конкурентни со нив“, рече Орбан.
Тој додаде дека неговата влада се подготвува за светот по војната, како и за победата на општите избори во Унгарија во 2026 година.
„Можеме да сметаме само на себе, мораме да останеме независни, мораме да останеме суверени. Ова не е само прашање на чест и самопочитување, туку и економско. Кога Унгарија не е свој господар, секогаш економски страда, не ѝ оди добро. Бевме успешни само кога Унгарија беше суверена, независна држава и одеше по својот пат“, заклучи Орбан.
Извор: tv21
