Советот на Општина Ѓорче Петров денеска го изгласа Буџетот за 2024 година. Основниот буџет е во вкупна вредност од 376.113.165,00 денари, а огромен процент од планираните расходи ќе биде наменет за капитални инвестиции, односно 28% од вкупните расходи ќе одат за реализација на проекти.
– Ова е историски највисок процент на средства одвоени за реализација на капитални проекти во последните години !Во 2024 година општината првпат целосно ќе ги покрива сите материјални трошоци за основните училишта во вкупен износ од 25.500.000 денари, порача градоначалникот Александар Стојкоски.
Општина Ѓорче Петров и во наредната година ќе продолжи целосно да ги надоместува трошоците за децата на бранителите од конфликтот во 2001 година кои се запишани во школите и градинките.
Со буџетот за 2024 година планирани се средства за:
– Изградба и реконструкција на улици во урбан и рурален дел на општината.
– Нови линии за атмосферска, фекална канализација и пречистителни станици.
– Изградба на нови спортски и детски игралишта.
– Проектирање на нова детска градинка.
– Највисока поддршка досега за спортот и културата.
– Нова урбана опрема.
– Животна средина, чист воздух, подигнување зеленило.
– Чистење одводни канали.
– Повторно носиме буџет исклучиво во интерес на нашите граѓани и наменет за проекти кои ќе го подобрат секојдневието во Општина Ѓорче Петров. Со средствата раководиме рационално, домаќински, отчетно и транспарентно и така ќе продолжиме и во следната година, порача градоначалникот Стојкоски.
ИЗВОР: skopjeinfo.mk
