Општина Битола заедно со Културниот и информативен центар (КИЦ) денеска организираа отворен ден под мотото „Твој избор – твоја иднина“, наменет за идните средношколци кои се во процес на избор на средно образование.
Настанот се одржа на платото пред Офицерскиот дом, каде што беа поставени штандови на средните училишта, младински организации и здруженија кои работат со млади.
Идните средношколци имаа можност директно да се информираат за образовните насоки, наставните програми и можностите што ги нудат училиштата, како и да разговараат со наставници и претставници на институциите.
Во рамки на програмата беа организирани презентации, проекти и музички содржини, со што настанот доби и едукативен и забавен карактер.
Од Општина Битола посочуваат дека ваквите активности имаат за цел да им помогнат на учениците полесно да донесат одлука за нивното понатамошно образование и да се запознаат со сите можности што им стојат на располагање.
Со овој отворен ден, Општина Битола, КИЦ и средните училишта ја продолжуваат практиката на директна комуникација со младите и нивно насочување кон правилен избор на образование.
