Првиот потпретседател на Владата и министер за животна средина и просторно планирање, Изет Меџити при садењето на садници во новиот Мега парк во општина Карпош, како дел од акцијата за урбано зазеленување на Скопје, со донација од Европската Унија преку проектот „ЕУ за чист воздух“, денеска рече дека ќе бидат засадени околу 6 000 дрвја, во Тетово, Куманово и Битола.
„Работејќи заедно, успешно ги усогласивме ресурсите, експертизата и заедничката посветеност за подобрување на урбаните средини. Со засадување на 956 дрвја, стари по две и три години, од 16 автохтони видови, кои покрај ефектот на намалување на количината на CO2 во атмосферата, ќе ги апсорбираат и ПМ честичките, ќе ги ограничат ефектите од урбаните топлински острови, дополнително со зеленилото на разни локации во градот ќе ја направат околината многу поубава и поатрактивна за рекреативни активности, како што се бреговите на реката Вардар”, рече Меџити.
Министерот за животна средина и просторно планирање, Изет Меџити вчера, пак, ја претстави новата Планска програма за почист воздух 2024-2030.
Тој рече дека целта на програмата е долгорочно и среднорочно решавање на проблемот со загадувањето на воздухот во Северна Македонија.
Според Меџити, програмата вклучува активности за намалување на емисијата на штетни честички од различни извори: домашни ложишта, јавни објекти, транспорт, индустриски процеси, земјоделство и шумарство. Посебно внимание е посветено на проектите за енергетска ефикасност, зголемување на зеленилото и намалување на емисиите од транспортот.
„Не сакаме да ветуваме решенија што не можеме да ги исполниме во краток рок. Затоа, оваа програма е фокусирана на долгорочна промена,“ изјави Меџити.
Повеќе градови во Македонија честопати се наоѓаат на листите најзагадени во светот: Скопје, Струмица, Тетово, Битола и други се загадени со концентрации ризични за здравјето на граѓаните.
Секоја година од 3.828 до 5000 луѓе во државава ги губат своите животи како директна последица на изложеноста на штетните честички PM2.5., како што рекоа демонстрантите на протестот на 10 декември пред Владата и пред Министерството за животна средина и просторно планирање во Скопје. Најновиот извештај на УНИЦЕФ, предупредува дека едно од девет бебиња во Македонија умира поради загаден воздух.
ИЗВОР: racin.mk
