„По настапот на Јахорина синоќа, се обидоа да ме убијат мене и мојот возач, едвај се спасивме живи. Се обидоа да нè убијат“, напиша Лукас во приказна на Инстаграм.
„Српскаинфо“ не можеше да добие никакви информации од полицијата, освен што ќе издадат соопштение кога ќе имаат информации од теренот.
Аца Лукас детално ја опиша драмата што, според неговите сопствени тврдења, ја доживеал по враќањето од Јахорина, каде што настапувал. Лукас наведува дека на пат кон Србија бил цел на сериозен напад, кој го карактеризира како обид за убиство, пренесе Мондо.
Според Лукас, инцидентот се случил откако тој и неговиот возач го напуштиле хотелот на Јахорина за Србија.
„Пеев на приватна забава. Кога завршивме со настапот, се качивме во автомобилот и се упативме кон Србија. Во Пале, забележав дека возило се „закачило“ на нашиот автомобил. Беше очигледно дека нè следи. Му реков на возачот да застане за да може да нè заобиколи, но тоа не се случи. Наместо тоа, возилото остана зад нас“, рече Лукас, откривајќи дека следела брканица од околу 20 километри, како од филм.
„Се движевме понатаму, а тие тргнаа по нас. Во еден момент се нафрлија и почнаа да нè удираат. За време на брканицата, нè удрија околу петнаесет пати. Имавме среќа што останавме живи. Нивната цел беше да нè тргнат од патот“, тврди пејачот.
Лукас наведува дека ја повикале полицијата во градот Соколац, по што возилото што ги следело се оддалечило. Тој додава дека полицијата извршила вештачење на автомобилот и дека камерите, според него, утврдиле дека возилото било во сопственост на лице со криминално досие, иницијалите М. Д., додека зад воланот бил неговиот возач, Н. М., кој, како што наведува, е уапсен.
„Тој човек не бил во автомобилот, туку неговиот возач и неговото возило. Сè било организирано и наместено. Немам никаков контакт со овие луѓе и не ги познавам. Во Република Српска имам отворен конфликт со Недељко Елек и сите индиции, според мене, укажуваат на него“, рече Лукас претходно.
Лукас објави и фотографии од оштетеното возило.
Уредничкиот тим на Курир го контактирал и Недељко Елек, претседател на Надзорниот одбор на Олимпискиот центар Јахорина, кој категорично ги негирал наводите на Аца Лукас.
За потсетување, настапот на Аце Лукас на Јахорина, планиран за 12 декември 2025 година како дел од настанот „Скијачко отворање“, беше откажан откако на социјалните мрежи се појави фотографија од пејачот во друштво на Насер Ориќ.
Извор: vecer.mk
